Gwybodaeth » Iechyd » Iechyd a Materion y Corff » Heintiau Wrin ac Anymatal
Llid y Bledren (Cystitis)
- Haint wrin yw llid y bledren sy’n cael ei achosi pan ddaw’r bledren a’r wrethra ( y tiwb sy’n cario’r wrin o’ch pledren allan o’ch corff) yn llidus
- Mae’n anghyfforddus ac mae’n rhoi’r teimlad ichi eich bod chi am wneud dwr o hyd. Weithiau fe all yr wrin fod yn gymylog ac yn ddrewllyd, neu fe all gynnwys diferyn o waed
- Gall bacteria o’r anws beri llid y bledren. Mae’n bwysig bod merched yn sychu o’r tu blaen i’r tu ôl i osgoi lledaenu’r bacteria tuag at y bledren
- Gall rhyw egnïol neu aml hefyd ei achosi
- Nid yw llid y bledren yn ddifrifol ac mae modd ei drin ag:
- antibiotigau oddi wrth eich meddyg
- triniaethau dros y cownter
- yfed sudd llugaeron (cranberry)
- yfed mwy o ddwr
Anymatal
- Colli rheolaeth ar y bledren yn llwyr neu'n rhannol yw anymatal, gan olygu nad ydych chi'n gallu dal eich dwr
- Fel arfer, pan fydd angen ichi wneud dwr, fe fydd eich pledren yn anfon neges i’r ymennydd i ddweud ei bod hi’n llawn. Bydd anymatal yn digwydd pan fydd y neges yn methu â chyrraedd eich ymennydd yn iawn
Mathau o anymatal
- Anymatal stres: bydd ychydig iawn o wrin yn gollwng wrth wneud gweithgaredd corfforol. Bydd hyn yn digwydd pan fydd y cyhyrau yng ngwddf y bledren yn rhy wan i ddal y dwr yn eich pledren pan fyddwch chi’n pesychu, yn chwerthin, yn tisian neu’n gwneud gweithgaredd egnïol
- Anymatal ysfa: bydd y bledren yn gwacáu yn llwyr
- Mae yna nifer o ffyrdd o drin anymatal gan ddibynnu ar y math rydych chi’n dioddef ohono. Fe all fod o help yfed llawer o ddwr, a bwyta digonedd o ffrwythau a llysiau. Fe allai peidio â smygu a pheidio ag yfed alcohol neu gaffein hefyd leddfu anymatal
- Hefyd, gallwch chi roi cynnig ar ymarferion llawr y pelfis er mwyn cryfhau'r cyhyrau
- Fe all fod llawer o ffactorau sy’n gysylltiedig ag anymatal:
- Stres
- Ar ôl bod yn feichiog, o ganlyniad i lacio cyhyrau llawr y pelfis
- Heintiau’r bledren (Cystitis)
- Strôc
- Canser ar ran benodol o’r corff
- Diciâu
- Sglerosis ymledol
- Pledren lidiog
- Gorddryswch henaint
- Clefyd Alzheimer
Gwlychu’r gwely
- Er mai ymhlith plant y mae gwlychu’r gwely fwyaf cyffredin, mae’n effeithio ar dros un miliwn o bobl yn y DU, gan gynnwys un ym mhob chwech o blant pump oed, un ym mhob 20 o blant deg oed ac un ym mhob cant o oedolion
- Nid oes unrhyw un peth sy’n achosi gwlychu’r gwely, ond mae’n bosib ei fod yn gysylltiedig â stres, anymatal wrinol, alcohol, caffein, tabledi cysgu neu haint wrin
- Ceisiwch gwtogi ar yr alcohol, y caffein a’r diodydd rydych chi’n eu hyfed cyn mynd i’r gwely. Efallai y byddwch chi am roi cynnig ar osod eich larwm cwpl o oriau cyn ichi fynd i gysgu i’ch deffro chi yn y nos neu gwpl o oriau cyn y byddech chi’n deffro fel arfer, er mwyn defnyddio'r toiled. Ceisiwch amrywio’r amser rydych chi’n ei osod fel nad ydych chi’n dod i arfer â gwacáu’ch pledren yr un amser bob nos
- Os oes gennych chi unrhyw bryderon ynglyn â heintiau neu broblemau wrin, peidiwch â theimlo cywilydd. Gall eich meddyg eich cynghori ar sut i ddelio â’r broblem
