CLIConline

Gwybodaeth » Tai » Byw yn eich cartref newydd a'i gynnal » DIY (trwsio'r ty heb gymorth)

Mae angen gofal a sylw parhaol ar eich tŷ er mwyn ei gadw'n lân, taclus a diogel
P'un ai eich bod yn berchen ar eich tŷ neu'n ei rentu, chi sy'n gyfrifol am ei gynnal. Yn wir, os yw'ch landlord yn credu nad ydych yn cadw'r tŷ'n iawn, gall ofyn i chi adael eich tenantiaeth
Fel canllaw, dyma rai awgrymiadau o'r pethau y dylech eu gwneud yn eich cartref
Bob dydd, dylech:

Peidiwch â gadael i ddyletswyddau'r tŷ gynyddu. Dylech lanhau a thacluso wrth i fynd yn eich blaen er mwyn cadw eich tŷ mewn cyflwr da
Os ydych yn byw gyda phobl eraill, lluniwch amserlen glanhau fel y bydd y dyletswyddau wedi'u rhannu rhwng pawb ac nid yw unrhyw beth yn cael ei anghofio
Cofiwch, os ydych yn berchen ar anifail anwes, rhaid ystyried y glanhau a chynhaliaeth ychwanegol sy'n gysylltiedig â hyn a bod yn barod i ymdrin â rhagor o wallt a rhai damweiniau
Peidiwch ag anghofio am y tu allan i'ch cartref. Mae angen yr un faint o ofal ar erddi ag sydd ei angen ar dai, felly cadwch yr ardd yn dwt a thaclus a heb sbwriel ynddi

DIY

Mae DIY ('Do It Yourself') bellach yn boblogaidd iawn. Gall talu am berson proffesiynol i wneud tasgau yn y tŷ fod yn ddrud felly mae llawer o bobl yn dewis gwneud y tasgau eu hunain
Gall DIY gynnwys unrhyw beth o godi silff neu addurno ystafell i blymio, ond gwnewch yn siŵr eich bod yn gwybod yn union beth rydych yn ei wneud cyn cychwyn. Gall gwaith DIY gwael fod yn beryglus a drud. Bob blwyddyn mae tua 70 o bobl yn marw o ganlyniad i ddamweiniau DIY ac mae mwy na 100,000 yn cael eu hanafu'n ddifrifol
Ni waeth pa mor fach yw'r dasg, byddwch yn ofalus a sicrhewch eich bod yn ddiogel a'ch bod yn gwneud y dasg yn gywir
Os nad ydych yn siŵr, ceisiwch gyngor person proffesiynol. Peidiwch â chychwyn tasg os nad ydych yn hollol sicr o'r hyn rydych yn ei wneud
Dyma rai awgrymiadau ar DIY

Gwisgwch ddillad amddiffynnol fel gogls, menig neu fwgwd llwch wrth wneud tasgau fel paentio, llifo neu waith gyda gwydr
Wrth ddefnyddio cynnyrch sy'n cynhyrchu mygdarth neu lwch, gwnewch yn siŵr fod digon o wynt yn dod mewn i'r ystafell a pheidiwch byth ag ysmygu yn yr ardal
Gwnewch yn siŵr eich bod yn defnyddio'r offer cywir bob amser. Peidiwch â defnyddio offer anaddas. Trwy ddefnyddio'r offer cywir bydd y dasg yn cael ei chyflawni'n fwy effeithiol ac yn ddiogel
Wrth ddefnyddio ysgol, sicrhewch ei bod yn sefydlog a gofynnwch i rywun i'w chadw'n wastad pan rydych yn ei defnyddio, os yn bosib
Wrth ddefnyddio siswrn neu gyllyll, torrwch i ffwrdd o'ch corff
Os ydych yn trwsio teclyn trydanol, diffoddwch ef cyn i chi gychwyn a chymerwch y plwg neu'r ffiws allan. Mae hi hefyd o fudd gwisgo esgidiau â gwadn rwber rhag ofn y cewch chi sioc drydan
Dysgwch yr hyn y dylech ei wneud mewn argyfwng. Cadwch ddiffoddwr tân yn y tŷ a pheidiwch byth â rhoi dŵr ar dân trydanol
Dylai person proffesiynol cofrestredig wneud tasgau sy'n ymwneud â nwy neu drydan
Wrth ddrilio neu roi hoelion mewn wal, gwnewch yn siŵr nad oes pibellau dŵr neu wifrau y gallwch eu torri yn y wal honno
Cynlluniwch y dasg yn ofalus cyn dechrau arno. Bydd hwn yn sicrhau na fyddwch yn brysio'r gwaith; gall hynny achosi damweiniau

Os ydych yn denant, dylech holi'ch landlord cyn cychwyn ar unrhyw waith DIY. Efallai y bydd eich contract yn dweud nad oes hawl gennych newid unrhyw beth yn y tŷ. Os oes problem gennych sydd angen ei thrwsio, siaradwch â'ch landlord yn gyntaf
Gall DIY fod yn beryglus ac achosir sawl damwain pan aiff tasgau DIY yn anghywir, felly gwnewch yn siŵr eich bod yn derbyn y cyngor cywir cyn cychwyn ar dasg