Gwybodaeth » Y Gyfraith, Hawliau a Dinasyddiaeth » Hawliau a Chyfrifoldebau
Mae hawliau dynol yn warantau cyffredinol sy’n gwarchod unigolion a grwpiau rhag gweithredoedd sy’n effeithio ar eu rhyddid a’u hurddas dynol. Mae gan bawb hawliau a warchodir yn ôl y ddeddf ac ni ellir eu cymryd oddi arnynt.
Fel plant a phobl ifanc mae hawliau ychwanegol hefyd i’ch gwarchod ac i sicrhau eich bod yn cael y cyfleoedd gorau mewn bywyd.
Datblygwyd yr hawliau ychwanegol hyn gan y Cenhedloedd Unedig a rhoddir manylion amdanynt yn yr hyn a elwir yn UNCRC - Confensiwn y Cenhedloedd Unedig ar Hawliau’r Plentyn.
Mae’r Confensiwn yn cynnwys 54 o “erthyglau” neu brif feysydd y mae’r llywodraeth yn gyfrifol amdanynt sy’n sicrhau eich bod yn mwynhau hawliau i addysg, gwybodaeth, eich bod yn cael eich cynnwys mewn llunio penderfyniadau, gofal iechyd a safon byw dda, gweithgareddau hamdden, defnyddio iaith ac arferion eich teulu, triniaeth deg yn y system cyfiawnder troseddol a’ch bod yn gwybod beth yw eich holl hawliau.
Yn 2004 mabwysiadodd Llywodraeth Cynulliad Cymru yr UNCRC fel sail i’w holl bolisïau ar gyfer plant a phobl ifanc, gan ategu eich hawliau ym mhob agwedd o’i waith. Mae CLIC yn brosiect pwysig sy’n helpu i gyflenwi Erthyglau 13 ac 17 UNCRC sy’n ymwneud â’ch hawl i wybodaeth a defnyddio’r cyfryngau.
