Cegin Eddie: Fajitas
Dwi'n gwybod fy mod i wedi addo ychydig yn ôl i ysgrifennu rysáit am chilli con carne, ond yn anffodus, nid wyf wedi cael amser i arbrofi gyda'r rysáit fy hun, felly dwi wedi penderfynu temtio ti gyda fajita i gychwyn.
Beth fydd angen?
- 500 gram o frest cyw iâr (tua 3-4 brest, wedi sleisio)
- 1 nionyn canolig (wedi sleisio)
- 3 pupur melys (melyn, gwyrdd a choch wedi sleisio yn denau)
- Cymysgedd sbeis (mae cyw iâr yn iawn, ond gall gael pecyn o gymysgedd fajita o unrhyw archfarchnad)
- Salsa (mwyn, canolig neu boeth – yn dibynnu pa mor boeth wyt ti eisiau)
- Caws wedi'i gratio (mae cymysgedd cheddar a mozzarella yn gweithio'n dda)
- Ychydig o olew olewydd hynod-goeth
- 8 lapiad tortilla (unrhyw faint)
Dull
- Sleisio'r cyw iâr i dafellau 1cm (bydd angen cyllell miniog iawn ar gyfer hyn)
- Rho'r cyw iâr mewn bowlen gydag ychydig o'r olew olewydd a'r cymysgedd sbeis
- Bydd angen cael dy ddwylo i mewn iddo a chymysgu dy gyw iâr, olew a chymysgedd sbeis nes bydd y cyw iâr wedi'i orchuddio (os oes gen ti fenig rwber, defnyddia nhw)
- Mewn padell ffrio ddwfn POETH bydd angen ychwanegu'r cyw iâr (wrth ddefnyddio gefel neu fforc bydd angen troi'r cyw iâr bob 5 munud nes iddo goginio drwyddo)
- Unwaith mae'r cyw iâr wedi coginio, tynna ef o'r badell a'i roi mewn bowlen fawr
- Nawr i'r badell ychwanega ychydig mwy o'r olew, a dy nionyn a'r pupur melys. Gad iddynt feddalu, yn troi yn aml.
- Mwn padell ffrio ddwfn, cynhesa'r lapiadau tortilla am 10 eiliad pob ochr (neu roi nhw i gyd mewn popty ping am 45 eiliad i funud)
- Serfio a mwynhau
Sut wyt ti'n adeiladu lapiad?
- Rho'r tortilla ar blât
- Rho 3 i 4 darn o gyw iâr yng nghanol y tortilla
- Rho gwpl o lwyau o'r nionod ar pupur melys
- Rho ychydig o salsa
- Rho bentwr bach o gaws
- Plyga gwaelod y tortilla, yna'r ddau ochr
Awgrymiad y Chef
- Am flas ychwanegol rho ychydig o pancetta neu gig moch brith fwg wedi'i ddeisio
Dwi'n gobeithio byddi di'n mwynhau'r un yma, byddaf yn hapus i dderbyn unrhyw syniadau, sylwadau ac awgrymiadau.
DELWEDD: megan.chromik
