Y Newyddion Heddiw
Am y bythefnos ddiwethaf yr unig beth glywaf a'i weld ar y teledu ydy'r 'super injunctions', plentyn cyfrinachol Arnie a Cheryl Cole yn America.
Dwi wedi cael llond bol o glywed am y materion pitw yma fydd wedi'u hanghofio mewn ychydig fisoedd, ond sydd ar hyn o bryd ar flaen tafod pawb.
Dwi ddim yn talu llawer o sylw i'r newyddion fel arfer; yn arferol dwi ddim eisiau clywed am ba beth dadleuol mae gwleidydd wedi'i ddweud neu os yw Obama yn well arlywydd nag Bush.
Ond, byddai'n well gen i glywed am hyn na chael pawb yn siarad am bethau mor bitw sydd â dim pwysigrwydd i'r cyhoedd cyffredin. Ydw, dwi yn deall fod pobl yn hoffi selebs a hel clecs, ond ydy gwybod am bêl droediwr sydd wedi bod yn cysgu gyda meistres a sawl plentyn gall y Terminator gynhyrchu yn gyfrinachol mor bwysig â hynny?
Ble mae'r newyddion diweddaraf am y rhyfel yn Libya a'r tornado enfawr sydd wedi taro America? Dyma'r pethau dwi eisiau darllen a chlywed ar y newyddion. Mae'r rhain wedi effeithio cymaint o bobl dros y byd mewn cymaint o ffyrdd gwahanol.
Ond eto dim ond y sylw lleiaf sydd yn cael ei roi iddynt os nad yw'n ymwneud â'r DU yn uniongyrchol, fel y Rhyfel Yn Erbyn Terfysgaeth. Dim ond pan fydd milwr yn marw mae'r papurau newydd yn adrodd arno. Nid oes sôn go iawn wedi bod ar ble rydym yn y rhyfel, neu os ydym ni yn cael i unlle mewn gwirionedd.
Ond, roeddwn i'n falch o glywed fod cyfiawnder wedi ei wneud yn ddiweddar i'r holl bobl sydd wedi cael eu heffeithio (ydw, dwi yn sôn am farwolaeth Bin Laden). Dwi ddim eisiau dathlu marwolaeth dyn, a dwi ddim yn credu fod lladd un arweinydd terfysgaeth yn gwneud llawer o wahaniaeth, ond yn sicr mae adrodd am hyn i gyd yn fwy pwysig na phen ôl enwog Miss Middleton.
Nid y rhyfeloedd rydym yn ymladd ynddynt ydy'r unig beth dwi eisiau gwybod amdanynt. Mae yna broblemau byd eang eraill sydd angen mwy o sylw yn y newyddion yn fy marn i. Fe ddigwyddodd y daeargryn a'r tsunami yn Siapan yn fis Mawrth (llai na tri mis yn ôl) ond eto mae fel petai'r papurau newydd wedi anghofio'n llwyr eu bod yn parhau i geisio dod allan o'r hunllef yma. Dim ond y digwyddiad ei hun bu'r gohebwyr yn sôn amdano, nid y canlyniadau sydd wedi dilyn.
Dwi'n gwybod mai'r papurau safonol (fel The Guardian a'r Independent) sydd yn adrodd yn bennaf am wleidyddiaeth a diwylliant, a bod y papurau tabloid (fel The Sun a'r Daily Mirror) yn adrodd yn bennaf ar y diwylliant poblogaidd a'r enwogion, ond ar nifer o achlysuron maent yn cyfarfod ei gilydd hanner ffordd.
Iawn, dwi yn cytuno fod llawer mwy i'r byd hwn na chyfnodau isel caled, ac weithiau mae clecs selebs yn gwrthdynnu'n sylw o fywydau ni'n hunain. Er hynny, ydy dilyn uchafbwyntiau ac isafbwyntiau gyrfa Cheryl Cole yn fwy pwysig na chyflwr ariannol presennol y wlad?
Fy mhwynt yw: mae clecs selebs yn ddiflas dros ben pam mai dyma'r unig beth mae pobl yn siarad amdano yn barhaol.
Â'i fi yw'r unig un, yn yr oedran tyner o 21, gyda'r farn hon?
Neu ydy hyn yn achos o fynd yn hen cyn fy amser, yn ymateb fel dynes hen sarrug sydd wedi colli ei humbugs?
